فندق سلمان الجزء الثانى

نزلت سلمي من الميكروباص ومشيت شارع طويل ضلمة كله شجر لحد ما وصلت للفندق دخلت سالت فالاستقبال دخلوها لمساعد المدير استاذ نشأت

سلمي : صباح الخير كان فيه حد كلمني عشان اشتغل هنا فالفندق وعلي حسب الميعاد انا جيت

استاذ نشأت : تمام اقعدي

سلمي : ده c.v بتاعي فيه كل ورقي

استاذ نشأت : تمام تمام احنا قرينا كل حاجه عنك فالابلكيشن اللي كنتي سيباه هنا

سلمي : في سرها ( ابلكيشن انا اول مره اجي هنا ماله ده )

سلمي : ممكن اعرف الشغل عباره عن ايه

استاذ نشأت : اكيد واحده معاها دبلوم مش هنشغلها مديره مكتب

سلمي : انا مقولتش كده بس اعرف هشتغل ايه بدون تريقه لو سمحت

استاذ نشأت : مبدايا هتشتغلي مشرفه قسم النظافه وده عشان الواسطة اللي جتلك مش عارف انتي عرفتي منين المدير يعني بس واحدة جميله زيك يعني …

سلمي قاطعته: (بزعيق) انا مش فاهمه حاجه ولا اعرف المدير بتاعك ولو سمحت انا مسمحش أي تجا..

استاذ نشأت : لولا المدير انا كنت طردتك بره ازاي تعلي صوتك هنا عموما ادي ورقه تعيينك بس قبل ما تتعيني فيه كام ملحوظة تخصصك فالفندق والغرف لكن البدروم لو فكرتي تنزليه مش هيحصلك كويس سامعه ده لو فضلتي عايشه يعني ..

سلمي برعب وخوف اخدت الورقة وخارجه بتجري خبطت فواحد ووقعت الورق

سلمي : اسفه بس اصل …

كريم : اهدي اهدي محصلش حاجه هو ضايقك ولا ايه

سلمي : هو مين اللي ضايقني

كريم : استاذ نشأت تحسيه بيكره اي مؤنث أكن أمه كانت بتعذبه وهو صغير ده حتي متجوزش لحد دلوقت

سلمي (بابتسامة) : ضحكتني والله انت اسمك ايه

كريم : اسمي كريم بس بما انك ضحكتي ممكن تقوليلي ياكيمو

سلمي وهي بتلتفت شافت صوره الراجل الكبير اللي قابلها اتنفضت كده وقالت لكريم : مين الراجل ده

كريم بضحك : ايه عجبك علي فكره انا احلي منه

سلمي : (وبدات تخاف) افندم عن اذنك

كريم : استني بس انا .. انا كنت بهزر هي مشيت ليه

مشيت سلمي قبل حتي ما يكمل كلامه وهي مشغوله ايه حكايه الفندق ده كل حاجه غريبه وناس غريبه وإزاي الراجل ده صورته متعلقه كده ومين المدير اللي يعرفني ده انا مبقيتش فاهمه حاجه فضلت تفكر لحد ما وصلت للطريق بره وركبت ميكروباص ومشيت …

وصلت البيت لاقت مامتها مستنياها بتسالها

ام سلمي : عملتي ايه فالشغل الجديد يارب يكونوا قبلوكي

سلمي : ماما انا تعبانه سيبيني ارتاح

ام سلمي : يعني ايه اوعي تكوني اتخانقتي معاه هو كمان زي المدام صاحبه الاتيليه

سلمي : حرام عليكي سيبيني ارتاح انا تعبانه

ام سلمي : انتي اللي ورطينا ولازم تشوفي حل هنتطرد من البيت بسببك

سلمي : بسببي ولا بسبب انك صرفتي فلوس الايجار بسببي ولا بسبب انك مش حاسه بيا وبتعبي انا طول عمري شايفه وساكته

ام سلمي : علي فكره بقي المعاش كان هيقضيني انا وابني يعني فلوسك ليكي والمدرسه اللغات اللي دخلتي اخوكي فيها

سلمي : وانا عملت كل ده ليه مش عشان اشوفه احسن مني مش عاوزه يبقي زيي ياماما حرام كفايه انا

ام سلمي : يبقي متعايريناش ياحبيبتي من بكره أخرجه من المدرسه وانزله يشتغل صنعه تنفعه

سلمي : لا ارجوكي الا سولي انا هقبل الشغل وهشتغل واعمل كل اللي عايزاه بس بلاش يطلع من المدرسه بلاش

ام سلمي : ايون كده اتعدلي خشي نامي لحد ما احضر الغدا

دخلت سلمي من التعب بهدومها ع السرير وحزينه علي كل اللي بتمر بيه وعماله تفكر هتعمل ايه تنزل الشغل اللي مرعوبه منه وتقبل بيه ولا تنزل بكره تدور علي شغل جديد وعي بتفكر نامت من التعب .. حلمت بنفس الراجل جالها فالحلم بيقولها ….. ( انزلي ياسلمي الفندق وانجديني وانجدي نفسك انزلي ياسلمي الشغل انزلي )

قامت سلمي مفزوعة من الحلم وبتصرخ .. ياتري مين الراجل ده وليه صورته فالفندق ؟

تابع معانا الجزء الثالث